白话广州　◎李月婷 编辑　

　　呢几日大学城出咗段趣闻，中大嘅一位男生日日踩住部三轮车喺校园里边“招摇过市”。大家唔好以为佢系为咗博出位，实情佢都觉得好无奈——因为佢已经俾人偷咗四部单车喇。

　　时下嘅年轻人真系充满智慧，咁都俾佢谂到！用一部辨识度极高嘅三轮车断绝咗偷车贼嘅希望。不过，喺旧时嘅广州，俾人偷单车系一件好普通嘅事，有人仲开玩笑咁讲：“未俾人偷过单车嘅唔算广州人。”大家都知，喺上世纪嘅七八十年代，单车对于市民来讲系极为重要嘅代步工具，同时亦都系每一个家庭嘅重要资产。当时嘅结婚三大件就包括咗单车，凤凰、永久、五羊呢啲牌子大家都唔陌生。

　　由于单车嘅重要性，单车保管就极为重要。有条件嘅就放喺保管站办个月保，冇条件嘅就将部车托上宿舍楼放喺楼梯口。不过，虽然做足保护措施，但系偷单车事件依然经常发生。大家可能仲记得，以前嘅中山一立交桥底就系一个“黑车交易中心”，有贼仔来呢个地方甩手贼赃，亦都有贪平嘅市民来呢度买单车。一个唔觉意，可能仲会买返自己俾人偷嘅嗰部单车添。

　　依家，上边提到嘅黑车交易点已经销声匿迹。正所谓有人买先至有市场，要完全杜绝偷单车就要大家一齐抵制贼赃。嗰位俾人偷咗四部单车嘅大学生，不妨安慰自己，你部单车只不过系俾第二个人有偿“借用”咗。你买部三轮车代步而冇“借用”其他人嘅单车，我觉得真系一个明智之举。

（责任编辑：李明俐）